Aðventukaffi

Við héldum aðventukaffi í dag, fyrsta aðventukaffið á þessari jólaönn. Það var gaman að fá Þórunni og fjölskyldu frá Stadtlohn í smá jólalegt kaffi. Mikið rætt um byggingar og annað slíkt sem gefur að skilja og þeim leist bara vel á. Þetta verður spennandi að fylgja þessu verkefni okkar. Þau fara til Íslands yfir jól og áramót og við hittumst svo í flugvélinni á leiðinni heim.
Við fórum í göngutúr og tókum hundinn Lilly með en það er alltaf drifkraftur fyrir krakkana þegar hundurinn kemur með.

Við fórum í gær til Munster og versluðum nokkrar jólagjafir sem Alex vildi endilega kaupa í Munster. Við vorum ekki alein þar, því getið þið trúað. Nú voru jólamarkaðirnir opnaðir og það koma heilu rúturnar til að skoða og kaupa eitthvað á jólamarkaði í Munster. Hann er með þeim frægustu í Þýskalandi. Fólk kemur frá nálægum sveitarfélögum og frá Hollandi. Já það er eftirsótt að vera í Munsterlandi yfir jólatímann. En þegar það er svona margt fólk þá þarf ég ekki að mæta á svæðið, það er pottþétt. Við náðum að kaupa nokkrar gjafir og jólafötin fyrir Nínu í HM. Svo fórum við að sækja Nínu en hún fékk að gista hjá vinkonu sinni sem við kynntumst í sumarfríinu í Svíþjóð, þau búa í Munster og þær hittast stundum, gaman að halda sambandi eftir sumarfrí finnst mér.

Jæja ég læt þetta duga í bili, njótið nú jólaamstursins, það er ekki mikið eftir. Þessi tími er svo skemmtilegur og fljótur að líða finnst mér.
ykkar jólaHelga