Hvað á maður að gera við svona veður!

Þetta er nú meira veðrið. Það er bara búið að ganga á með skúrum og stormi liggur við að maður segi. Svona mikið rok, (vindur á Ísl.mælikvarða) hefur sjaldan verið eins lengi eins og núna. Þetta fer alveg með sumarskapið sem ég var komin í. Vonandi að það létti til bráðlega því við erum á leið í smá stuttferð með stórfjölskyldu Alex um helgina. Á morgun er frídagur í skólanum og á föstudeginum er líka frí þannig að þetta verður löng fríhelgi. Við förum á svona sveitagistiheimili þar sem eru fullt af húsdýrum og sundlaug í kjallaranum (ekki fyrir dýrin) og ætlum að hafa það ægilega kósí, 20 manns í það heila.

Spáin lítur samt ekki vel út, rigning, þrumur og rok. Gaman, að fara í frí til að vera inni að spila spil. Við förum vel byrgjuð af innispilum, teikniblokkum, tússum, tölvuspilum og fleiru skemmtilegu.

Í næstu viku ætla svo tengdamamma og maður hennar að koma og vera í vikuheimsókn hjá okkur, það verður gaman að skreppa með þau á markað til Hollands þar sem maður hennar er Hollendingur. Nína er í skólanum alla daga vikunnar þannig að við tökum okkur þetta fyrir hendur á laugard.

Nína fékk bréf í gær frá bankanum sínum, þess efnis að hún hefði unnið til verðlauna fyrir mynd sem hún teiknaði í skólanum. En bekkurinn tók þátt í landskeppni í teikningum um ákveðið þema og krakkarnir völdu svo nokkrar myndir sem átti að senda inn fyrir hönd bekkjarins og hennar mynd var valin og svo vann hún, við erum ótrúlega stolt af henni en hún er svo dugleg að teikna. Þetta voru Huskys hundar að hlaupa, maður sá alveg að þeir voru á fullri ferð og svo voru þar fleiri dýr sem voru á myndinni. Verðlaunaafhendingin er næsta þriðjudag, spennandi ekki satt.