Frú Merkel kanslari Þýskalands

Kona við völdin í Þýskalandi. Þetta er svolítið sérstakt hér þar sem hlutverk kvenna er áberandi meira í skugga heldur en hlutverk manna. Þar á ég við á hefðbundnum heimilum og útávið. Auðvitað má deila um það hvað er hefðbundið og svo framvegis. Nágrannakonur mínar tala allar eins og menn þeirra ákveði um flest. Þeir gefa þeim leyfi til að fara út á vinnumarkaðinn, þeir ákveða um fleira en (leyfi ég mér að fullyrða) karlmenn á íslenskum heimilum þar sem jafnræði ríkir alla jafna. Íslendingar voru svo heppnir að hafa Vigdísi Finnbogadóttur forseta, kona í þessari stöðu þetta var alfrægt og er enn. Nú verður kanslari Þýskalands kona og ekki af verri endanum. Hún mætir ansi kröftugri gagnrýni. Hún er alltaf í buxnadragt og það er gert grín af því, hún er með frekar þunnt hár og það er gert grín af hárgreiðslu hennar, hún er oft með skeifu, nema þegar hún brosir og það er gert grín af því. Mikið mál er gert úr því að hún eigi engin börn, hún er með háskólapróf í eðlisfræði og er búin að vinna sig upp í stjórnmálum. Vissulega verða stjórnmálamenn fyrir gagnrýni en að mörgu leiti er verið að gera grín af kvennleika hennar. Hver gerir til dæmis grín af klæðnaði eða hárgreiðslu karl stjórnmálamanns? Þetta eru merk tímamót í sögu þýskra stjórnmála er sagt í blöðum. Vissulega er það það en líka neyðarlegt fyrir konur sem hafa svo lengi verið að berjast fyrir jafnrétti eins og raun ber vitni að það skuli kalla á það mikla athygli að kona komist til valda í Þýskalandi. Kona sem er ekki með stjórnmálamenntun en flestir stjórnmálamenn í Þýskalandi eru annað hvort stjórnmálamenntaðir eða lögfræðingar.

Vildi bara koma stuðningi mínum á framfæri við Frú Merkel, hún á eftir að eiga nógu erfitt í starfi. Bara svo hún þurfi ekki að hafa áhyggjur af því hvort ég styðji hana eða ekki!!!

Í gær fór ég til Ingu Bjarkar til Recklinghausen í heimsókn. Við löbbuðum um miðbæinn og versluðum smotterí. Það var mjög gaman að hitta hana, við verðum að vera duglegar að hittast Inga! Um helgina er svo saumaklúbbur og á laugardaginn þá ætlar Nína að vera með markað. Bankinn hennar býður upp á markað og allir krakkar sem eiga bankabók fá stæði til að selja gamalt dót, föt, spil, bækur eða hvað sem er. Það verður gaman fyrir hana. Hún hefur gert þetta einu sinni áður, þá í skólanum sínum og var hún mjög lukkuleg þá.

Í dag á Eveline tengdamóðir mín afmæli. Til hamingju með það mín kæra. Ég hringdi í hana í morgun og þá var strax komin heimsókn til að skála í freyðivín. Alltaf gert svo mikið úr afmæli hér, en mér finnst það æði. Skál fyrir því, eigið góðan dag, ykkar Helga