Flaut

Það er alveg merkilegt hvað Nína getur flautað stundum. Þá er ég að meina það þegar það er verið að flauta eitthvað með vörunum, það getur verið laglína eða bara einhver vitleysa sem kemur, hver þekkir þetta ekki. Hún flautar þegar hún vaknar og sérstaklega flautar hún af ákefð þegar hún kemur heim úr skólanum, alveg fullum hálsi ef þið skiljið hvað ég meina. Þetta er svo fyndið en stundum er ég alveg komin með nóg, þegar hún er að borða og flautar þar til gaffallinn kemur inn í munninn..... Svo er flautað þegar hún er að læra sem er daglega allt að tveir tímar í heimanám, þegar maður er að hjóla og bara nefnið það. Oft finnst mér eins og þetta sé stressmerki en hún er svo ánægð þegar hún flautar þannig að ég held ekki lengur að þetta sé stress, heldur einhver innri gleði sem brýst út.

Nágranni okkar, tæplega 40 ára, bankastarfsmaður er líka svona, hann flautar svo hátt að það heyrist á milli veggja. Hann flautar alltaf þau lög sem eru á þeim og þeim tíma mikið spiluð í útvarpinu og það er mjög vel gert hjá honum. Það er spurning hvaða innri hvöt þetta er hjá þessum einstaklingum. Þessi maður er mjög íþróttalegur, barnlaus og viðkunnalegur. Nú verður gaman að fá greiningu!