Snjór og foreldrafundur

Í dag er annar dagurinn í röð sem við vöknum þar sem jörð er hvít. Í gær vaknaði ég við einhverja skruðninga kl.5:30. Ég þurfti dágóðan tíma til að átta mig á því hvaðan hljóðið kæmi. Fyrst hélt ég að það kæmi úr húsinu okkar en eftir góða stund varð mér ljóst að hljóðið kom að utan, já fyrir utan húsið okkar. Hvað haldið þið?? Nágrannarnir mættir út með skóflu og salt í poka til að moka þessa 50 millimetra af snjó af gangstéttinni. Klukkan hálf sex að morgni til.... ég hallaði augunum aftur og sofnaði í smá stund værum svefni.....

Nína er mjög glöð að það sé snjór í smá stund á morgnana, hún fer strax eftir morgunmat út með kúst og sópar snjóinn af gangstéttinni fyrir framan húsið okkar, ægilega dugleg stelpa. Svo hjólar hún í snjónum í skólann en hún er sirka 15 mínútur á fullu á hjólinu í skólann sinn.

Í gær var foreldrafundur útaf því að nú þurfa krakkarnir að velja annað útlent tungumál, það er hægt að velja latínu eða frönsku og þá byrja þau í næsta bekk, 6.bekk. Þetta er nú meira málið hjá sumum. Það er nú ekki að spyrja að því, þetta er líka ekki gert auðvelt fyrir manni. Þeir krakkar sem eru ekki nógu öruggir í þessu skólaformi, þ.e. gætu þurft að skipta um skólaform, verða að velja frönsku því annars komast þeir ekki inn í annað skólaform eða skólarnir geta neitað að taka krakkana inn í skólann. Þeir sem eiga auðvelt með að læra, þeim er ráðlagt að velja latínu þar sem þeir geta svo líka valið frönsku í 9.bekk og fara þá á hraðleið og eru þá í 11.bekk komnir jafn langt í frönsku og þeir sem velja frönsku í 6.bekk. Sérstakt ekki satt?? Það var mikil ólga í foreldrum, sumir komu með athugasemdir eins og það að þetta væri nú ansi mikið fyrir krakkana, þeir hefðu margir hverjir nóg með námið eins og það væri í dag.... við því sagði skólastjórinn já þið völduð þetta skólaform og þurfið að vinna úr því í dag. Eða eitthvað á þá leið. Vissulega er þetta ekki auðvelt fyrir krakkana en það sem stjórnmálamenn ákveða þýðir lítið að vera að æsa sig við skólastjórann útaf, eða hvað segið þið? Ég vil endilega að Nína velji Latínu, hún er undirstaða svo margra tungumála og ég tala nú ekki um ef Nína verður dýralæknir sem er á döfinni þá er það mjög góð undirstaða. Nína er hins vegar að velta sér svo mikið upp úr því hvort það sé kennd latína á Íslandi því við erum jú á næsta skólaári að fara að flytja heim. Þar sem það er einungis kennt í MR þá finnst henni það vera tilgangslaust að byrja í latínu vitandi það að hún haldi ekki áfram í því á Íslandi. Ekki auðvelt val.....