kukl og trúin

Náttúrulækningar í Þýskalandi í dag. Við fórum í dag til mjög áhugaverðar konu sem er Heilpraktiker. Ég er líka Heilpraktiker en ekki orðin það mikið menntuð að ég treysti mér að taka fólk og greina það og lækna það á náttúrulegan hátt. Við fórum semsagt með dúlluna okkar hans Balthasar þangað í dag. Hún klippti hár af höfði hans og setti það í tölvugreiningarvél. Út komu svo miklar og merkilegar niðurstöður sem hún notaði til að greina hvaða remedíu passaði best fyrir hann í þessu ástandi sem hann er í. Hann er nú að skána ég tek það nú fúslega fram, á innúðalofti og atroventi, enda væri annað óeðlilegt en að hann væri að skána.

Hann er ekki með kíghósta, ég var nú eiginlega komin á það líka. Reyndar ekki nein próf tekin, bara það sem vélin hennar sagði. En það eru óþarfa veirur og bakteríur að ráfa um í honum sem eiga betur heima annarsstaðar og til að koma aftur á jafnvægi þarf þessi elska að taka inn nokkrar sortir af remedíum (globuli). En rót vandans liggur í þörmum hans. Finnst ykkur þetta ekki spennandi. Ég er alveg ótrúlega glöð yfir því að við höfum farið til hennar og eftir að hafa verið í klukkutíma í viðtali fór sex mánaða sonur minn í ausleitgeraet og það óþarfa- og til vandræða- efni verða pínd úr líkama hans með rafmagnsbylgjum. Hann var í tæpan klukkutíma í vélinni og á að fara fjórum sinnum til viðbótar í vélina, einu sinni í viku. Ég læt ykkur fylgjast með. Mér varð nú svolítið öðruvísi þegar kom að því að greiða fyrir þessa þjónustu en ég læt það liggja milli hluta hvað svona skemmtun kostar. Hver er svosem ekki tilbúin að borga aðeins til að losa barnið sitt við þjáningar og koma etv í veg fyrir ferli sem gæti fylgt honum lengi. Nú hugsa örugglega einhverjir, er Helga alveg að missa sig í þessari vitleysu? En ég skal bara segja ykkur það að þetta er ekki eins vitlaust og það hljómar!

Að öðru, leikurinn á sunnudaginn er hér á næsta leiti við mig, ég hef verið að gæla við þá hugmynd um að skella mér en treysti mér eiginlega ekki ein með börnin mín tvö. Hvernig er það á ekki að skella sér?

Svo vil ég benda á grein sem Óli bróðir sendi í Skessuhornið og hægt er að sjá útdrátt í útgáfunni á netinu. Ég er glöð fyrir hönd okkar í fjölskyldunni að hafa málsvara sem lætur í sér heyra og er ekki að taka því þegjandi og hljóðalaust þegar honum finnst rangt að máli farið. Ég veit að hann er ekki einn um að vera svona og að þeim er alltaf að fjölga í fjölskyldunni sem láta til sín heyra. Held að höfuð fjölskyldunnar í aðra átt sé nú ánægð með þetta!

Jæja elsku krúttin mín, best að leggjast til hvílu, seinustu tvær nætur hafa farið að mestu leiti í að hugga hóstandi barn svo að ekki veitir af því að koma sér vel fyrir nógu snemma! Verðum í bandi, ykkar græðari