Skrið, næturbrölt og kveðjupartý

Nína er búin að ákveða kveðjupartý fyrir bestu vini sína. Það verða tíu sem mæta og það á að fara í keilu eftir kaffi og koma svo í pizzu eftir keiluna. Þetta er um þarnæstu helgi á sunnudegi, ekkert annað var laust í keilu hér ská á móti. Það er fínt. Nína er ótrúlega jákvæð og glöð með flutningana. Þrátt fyrir að það sé sárt að sjá á eftir vinum sínum. En kannski koma amk Móna og Lisa einhverntíma í heimsókn. Móna er strax byrjuð að reyna að fá mömmu sína til þess að leyfa sér að koma, það er nú ekkert svo dýrt að fljúga, kostar jafn mikið og vika á reiðnámskeiði og Móna mundi alveg sleppa því til að geta komið. Við sátum í kaffinu í gær og vorum að spjalla, kíktum á landakortið og Akranes bækling, allt voða áhugavert. Nema mamma Mónu heldur að það sé ómögulegt að senda barnið í viku tíu daga með flugi á fjarlægar slóðir. Lisa og mamma hennar hins vegar tóku strax vel í þetta og mamma hennar sagði, þá þurfum við ekki að velta því lengi fyrir okkur hvert við förum í fríinu. Það verður spennandi að sjá svo hverjir koma....

Á mánudaginn var kveðjustund á Reiðbýlinu þar sem Nína hefur nú verið í tvö ár í reiðtímum á Íslenskum hestum. Hún er mjög spennt fyrir því að halda áfram í Reiðsportinu, maður verður að athuga hvernig það er, hvort það sé ekki hægt að fá að fara með einhverjum og vera smá þarna uppi í hesthúsum til að byrja með. Svo ætlar hún að kaupa sér hest, hún er löngu byrjuð að safna.

Balthasar er eitthvað ósáttur þessa dagana, hitinn er farinn og allt í lagi með það en nú er næturbrölt og pirringur í honum, búið að vera í tvo daga. Ég sé alveg glansa í tennurnar í gegnum slímhúðina í munninum en þær eru eitthvað feimnar þessar druslur. Þannig að við erum bara á chillinu á nóttunni, frekar óþolandi en það hlýtur að koma hjá okkur. Hann er farinn á fulla ferð drengurinn, eins gott að passa sig á honum. Alltaf svangur þessi elska, fékk Weetabix í morgunmat, hæstánægður með það, borðaði hálfan skammt á við Nínu! Nú fer þetta vonandi að koma með þetta matarstúss hjá honum.

Ég er bara svei mér þá ótrúlega dugleg að pakka, kemst varla í sturtu, hvað þá út að ganga fyrir stressi.... Í gær komu ruslakarlarnir að sækja skápana og hillur og eitthvað sem við vorum að sortera til þess að henda. Ég er svo hrædd um að gámurinn sé ekki nógu stór fyrir okkur!!!

Balthasar er byrjaður í aðlögun, hann fór í pössun í gær frá hálf tíu til eitt, gekk bara vel, hann verður vonandi áfram svona góður hjá öðrum. Ég hlakka til að koma til Íslands með krakkana mína og geta verið meira með fjölskyldu og vinum.

Hlynur frændi minn verður átta ára á morgun, ótrúlega er hann orðinn stór strákur....
Til lukku með soninn Óli minn.....á morgun vissulega! Það lítur allt út fyrir svaka veislu um helgina, góða skemmtun!

Við erum að fara til tengdaforeldranna á morgun að "kveðja" þannig að maður verður aftur á flakki þessa helgi, það er bara gaman. Nína fer líklegast ekki með, besta vinkonan hún Lisa heldur upp á afmæli sitt og Nína vill helst ekki missa af því, hún eigi örugglega ekki eftir að komast aftur í afmæli en eigi eftir að sjá ættingja sína oftar, kannski eitthvað til í þessu hjá henni en samt leiðinlegt að koma ekki með.....

Lifið heil