Sumt er svo skrýtið

Ósanngjarnt og óútskýranlegt. Það er kannski ekki gott að segja að örlögin ráði öllu og segja sig sigraðan í einu og öllu. En hvernig öðruvísi fær maður hlutina útskýrða. Sumt á maður ekki að skilja, vera æðrulaus og trúa. Já trúin er mikilvæg og kemur manni langt í lífinu en með henni einni saman er ekki allt útskýrt. Með æðruleysinu ekki heldur, ég trúi ekki á æðruleysið. En þegar á reynir þá er það áberandi hvað fjölskylda manns skiptir mikilu máli. Vinir og fjölskylda það er það sem er hald og traust okkar mannanna, maður á bara að opna leiðina.

Nú er komið að miklum tímamótum hjá okkur. Flutningur er á döfinni og það er ekki langt í hann. Ef einhverjir vilja koma í heimsókn og kannski pakka í einn eða tvo kassa þá endilega að skella sér í verslunarvingjarnlega ferð til Þýskalands. Gestaherbergið er enn laust nokkra daga áður en við flytjum. Ég hef ekki viljað opinbera neitt hér en okkar nánustu vita nú meira. Blessunarlega erum við hjónin komin með vinnu sem við erum rosalega ánægð með. Það eina sem er ekki alveg fastákveðið er pössun Balthasars tvo daga í viku en eins og Atli bróðir sagði þá reddum við þessu. Ég vil helst ekki þurfa að taka heilt pláss hjá dagmömmu því ég ætla að hafa Balthasar hjá mér þegar ég er ekki að vinna. Nú og húsnæði má segja bíður eftir okkur opið á Jörundarholtinu. Það kemur svo bara í ljós hve lengi við ílengjumst þar því við stefnum jú á að byggja á Skógarflötinni. Það er rosalega spennandi verkefni og ég þakka fyrir þá sem styðja okkur með jákvæðum tilsvörum í því. Það er ótrúlegt hvað sumir leyfa sér að gagnrýna mann, eins og maður sé ekki búinn að velta þessum hlutum vel fyrir sér! Nei engin tilfinningaflækja en sumu á fólk bara að halda fyrir sjálft sig. Við erum spennt fyrir þessu verkefni og svo sjáum við hver útkoman verður.